Aningaasaateqarfiup malittarisassai

§ 1
Aningaasaateqarfik ateqarpoq NunaFonden.

§ 2
Aningaasaateqarfik Nuup Kommuneani (maanna Kommuneqarfik Sermersooq) angerlarsimaffeqarpoq.

§ 3
Aningaasaateqarfiup pilersitsisoraa suliffeqarfik imminut pigisoq, Sparekassen Bikuben.

§ 4
Aningaasaateqarfik makkuninnga siunertaqarpoq:

a)
GrønlandsBANKEN A/S-imi aktianik pigisaqarnissaq pisinissarlu imaluunniit akisussaaffiusumik aningaasaliissuteqarneq

b)
Kalaallit Nunaanni inuussutissarsiornermut, tamanut iluaqutissanut ajunngitsuliuutaasumillu siunertanut iluaqutaaneq, taassuma ataani ingerlatseqatigiiffiit, peqatigiiffiit, sullissiviit il.il. siulersuisut namminneerlutik naliliinerat malillugu inunnik ikiuiniarnermut, isumaginninnermut, kultureqarnermut, ilisimatusarnermut tapersersorneqarnerat

c)
inunnut siunertani b)-mi taaneqartuni immikkut suliaqartunut tapiisarneq taarsigassarsititsisoqarnerluunniit

Ukiumi naatsorsuusiorfiusumi siulersuisut ukiumi naatsorsuusiorfiusumi ataatsimi isertitat tamakkerlugit atornissaannut tunngavissarsisimatinnagit, aningaasat sinneruttut ukiumut naatsorsuusiorfiusumut tullermut nuunneqarsinnaapput.

§ 5
Aningaasaateqarfiup aningaasaataanut tunngaviusut GrønlandsBANKEN-imi aktiaataapput 24.000.000 kr.-inik naleqartut, taakkunanngalu Namminersornerullutik Oqartussat aktianut aningaasaliissutigisaat 20.000.000 kr-iupput, aammalu BG Fonden-ip aktianut aningaasaliissutigisai 4.000.000 kr.-illutik.

Aningaasaateqarfiup aningaasaatai tunngaviusut siulersuisut aalajangiinerisigut qaffanneqarsinnaapput:

1.
aningaasaateqarfiup ukiumoortumik naatsorsuutai kukkunersiukkat kingulliit tunngavigalugit sillimmatinik sinneqartoorutinilluunniit nuussinikkut, imaluunniit

2.
aningaasaateqarfiup aningaasaataanut tunngaviusunut qaffaatissanik kingornussinikkut, tunissutisinikkut assigisaanilluunniit pissarsinikkut. Aningaasaateqarfiup aningaasaatai sukkulluunniit tapiiffigineqarnikkut qaffanneqarsinnaapput.

Aningaasat kingusinnerusukkut aningaasaateqarfimmut tutsinneqarumaartussat, imaluunnit sinneqartoorutit agguaanneqanngitsoortut siulersuisut sukumiinerusumik aalajangersaanerigut GrønlandsBANKEN A/S-imi aningaasanngorlugit akisussaaffiusumik aningaasaliissutitut imaluunniit aktianut, imaluunniit obligationinut, aktianut, qularnaveeqqusiussaqarluni taarsigassarsinermi allagartanut, illunik pisinermut assigisaannulluunniit aningaasaliissutitut GrønlandsBANKEN A/S-imut ilineqassapput.

Aningaasaateqarfiup pappiaraataanut nalilinnut ateq allanneqassaaq.

§ 6
Aningaasaateqarfiup siulersuisui arfinilinnik ilaasortaqarput, taakkulu imatut qinigaasarput:

1.
Kalaallit Nunaanni Inatsisartunut qinersisoqareerneri tamaasa Inatsisartut ilaasortassanik tallimanik taakkulu tamarmik immikkut sinniisussaannik ataatsimik toqqaasassapput

2.
BG Fonden (CVR-nr. 63246115) ukiut sisamakkaarlugit ilaasortassamik ataatsimik sinniisussamillu ataatsimik toqqaasassapput. Qinigaaqqittoqarsinnaavoq

Siulersuisunut ilaasortat qaammatisiutit malillugit ukiup 70-inik ukioqalerfigisamik naanerani aningaasaateqarfiup siulersuisuinit tunuartassapput.

§ 7
Siulersuisut akunnerminni siulittaasussamik toqqaassapput, aammalu suleriaasissatut maleruagassat tunngavigalugit suliamik ingerlannissaannut aalajangersaassallutik.

Siulersuisut aalajangiineri nalinginnaasumik taasinermi amerlanerussuteqartoqarneratigut akuersissutigineqartassapput. Taasisut amerlaqatigiippata siulittaasup taasinera aalajangiisuussaaq.

Sinniisussat Inatsisartunit toqqarneqarneqartut aatsaat siulersuisut ataatsimiinnerannut peqataasassapput, ilaasortatut toqqakkanit tallimaasunit ataaseq amerlanerusulluunniit takkutinngitsoorpata. Sinniisussaq BG Fonden-imit toqqarneqartoq siulersuisut ataatsimiinnerannut peqataasinnaatitaavoq, aatsaalli ilaasortaq sinniisuuffigisaq takkutinngippat taasisinnaatitaassalluni.

Aatsaat ilaasortat ikinnerpaamik sisamat najuuppata siulersuisut aalajangiisinnaatitaapput.

Siulersuisunut ilaasortat ataasiakkaat siulersuisunit aalajangerneqartutut annertussusilimmik akissarsiaqartinneqarsinnaapput. Akissarsiassat suliap annertussusia suussusialu, kiisalu ataatsimiinnerit ingerlanneqartut amerlassusaat tunngavigalugit annertussusilerneqassapput.

§ 8
Aningaasaateqarfimmi atsiortussat tassaapput siulersuisuni siulittaasoq siulersuisunut ilaasortat marluk peqatigalugit, imaluunniit siulersuisuni ilaasortat sisamat ataatsimoorlutik.

Siulersuisut pisinnaatitsissummik nalunaaruteqarsinnaapput.

§ 9
Siulersuisuni isumaqatiginninniarnerit allattaavinnut allanneqassapput, taannalu ilaasortanit najuuttunit tamanit atsiorneqassaaq. Allattaavinnut aalajangersakkat, agguaanermut paasissutissat pissutsillu allat aningaasaateqarfimmut soqutiginarsinnaasut tamarmik ikkunneqassapput.

§ 10
Aningaasaateqarfiup piffissaq ukiumut naatsorsuusiorfigisaa tassaavoq juunip aallaqqaataaniit maajip 31-anut.

Ukiut naatsorsuusiorfiusut tamakkerlugit ukiumoortumik naatsorsuusiortoqartassaaq, tassungalu oqimaaqatigiisitsineq, naatsorsuutit inerneri nassuiaatillu ilaatinneqartassapput.

Aammattaaq peqqissaarussamik ukiumoortumik nalunaarusiortoqartassaaq, suliffissuullu naatsorsuutai piumasarineqartut suliarineqartassallutik. Naatsorsuutit naatsorsuusiornermi ileqqut pitsaasut naapertorlugit suliarineqassapput, aammalu aningaasaateqarfiup ingerlanera naatsorsuutillu oqimaaqatigiinnerat pillugit eqqortumik takutitsissallutik. Aningaasaateqarfiup naatsorsuutai kukkunersiuisumit naalagaaffimmit akuerisaasumit ataatsimit amerlanerusunilluunniit, aningaasaateqarfiup siulersuisuinit toqqarneqartumit kukkunersiorneqassapput.

§ 11
Aningaasaateqarfiup siulersuisui tamarmiusut isumaqatigiillutik aalajangersakkat allanngortinnissaat imaluunniit aningaasaateqarfiup atorunnaarnissaa aalajangersinnaavaat. Aningaasaateqarfiup aningaasaataanut tunngaviusut aatsaat atorunnaarsitsinermut atatillugu akiliutigineqarsinnaapput.
Atorunnaarsitsinermi aningaasaatit siunertanut § 4-mi taaneqartunut tutsinneqassapput, tamatumani siulersuisut aalajangiinerat apeqqutaassalluni. Taamaattorli aningaasaatit pilersitsisumut imaluunniit inunnut ingerlatseqatigiiffinnulluunniit aningaasaateqarfimmut aningaasanik tunissuteqarsimasunut utertinneqarsinnaanngillat.